विज बिलभरणाच्या "फेक लिंक ओपन' करू नका

Advertisement

 

पिंपरी : तातडीने विजेचं बिल भरा आणि वीज तोडणी थांबवा असा मेसेज मोबाईलवर तुम्हालाही आलाय का? MSEB किंवा MSEDCLच्या वतीने आलेला वाटत असला तरी तो मेसेज फसवणूक करण्याचा नवा मार्ग आहे. एकट्या पुणे आणि पिंपरी-चिंचवड शहरात गेल्या सात महिन्यांत ऑनलाईन फ्रॉडच्या तब्बल 15 हजार 426 तक्रारी सायबर पोलिसांकडे नोंदल्या गेल्या आहेत. यामुळे अशी कोणत्याही फेक लिंक ओपन करू नयेत, असे आवाहन सायबर पोलिसांनी केले आहे. ऑनलाईन पेमेंटमुळे व्यवहार सुरळीत झाले आहेत. परंतु, असे ऑनलाईन पेमेंट करणं सुलभ असलं तरी सायबर गुन्हेगारांकडून विविध मार्गांनी लोकांची फसवणूक होत आहे. आता, वीज बिलाच्या नावाखाली सायबर गुन्हेगार लोकांची फसवणूक करत असल्याचे समोर आले आहे. सायबर भामट्यांनी आता MSEB अर्थात महावितरणची ऑनलाइन बीलं भरण्याच्या नावाखाली ग्राहकांची लूट सुरू केली आहे. पुणे आणि पिंपरी शहरात यासंबंधीच्या 311 तक्रारी सायबर पोलिसांकडे दाखल झालेल्या आहेत, अशा फसवणूकीच्या घटना टाळण्यासाठी महावितरणनं सावध राहण्याचं आवाहन केलं आहे. ऍड. कोमल साळुंखे-ढोबळे सांगतात की, फसवणुकीपासून वाचण्यासाठी काय करावं? वीज बिल भरण्यासाठी आपण ऑनलाईन पेमेंट प्रणाली वापरतो. हेच ओळखून ऑनलाईन बॅंकिंग वापरणाऱ्यांना लुटण्यासाठी सायबर भामट्यांनी नवाच फंडा शोधूला आहे. ग्राहकांच्या मोबाईलवर कॉल किंवा मेसेज करतात आणि सांगतात की, तुमचं लाईट भरलेलं नाही. पुढच्या तासाभरात तुमचं लाईट कनेक्‍शन कट होणार आहे आणि ते टाळायचं असेल तर आम्ही तुमच्या मोबाइलवर पाठवत असलेल्या ऑनलाइन लिंकवर जाऊन तात्काळ बील भरा. घरातली लाईट कट होऊ म्हणून ग्राहकही सायबर गुन्हेगारांच्या जाळ्यात अलगद फसतात आणि सायबर गुन्हेगारांकडून त्यांची आर्थिक फसवणूक होते. परंतु, महावितरणकडून केवळ नोदणीकृत मोबाईल क्रमांकाची नोंदणी केलेल्या वीजग्राहकांनाच सिस्टीमद्वारे एसएमएस पाठवले जातात आणि त्याचा सेंडर आयडी (Sender ID) हा MSEDCL (उदा. VMऑ- MSEDCL, VK- MSEDCL) असा असतो. त्यामुळं याशिवाय कोणत्याही वैयक्तिक क्रमांकावरून आलेल्या एसएमएसला प्रतिसाद देऊ नये. वैयक्तिक मोबाईल क्रमांकावरून आलेल्या बनावट एसएमएसना प्रतिसाद देऊ नये, तसेच यावरील कोणत्याही लिंकवर क्‍लिक करू नये. महावितरण MSEDCL शिवाय कोणतंही ऍप डाउनलोड करायला सांगत नाही. त्यामुळं वीज बिल भरण्यासाठी लिंक किंवा कोणतंही सॉफ्टवेअर डाउनलोड करू नये. वीज बिल भरण्यासाठी महावितरणकडून कोणत्याही प्रकारचा कॉल केला जात नाही, त्यामुळं अशा फेक कॉलला बळी पडू नये.