Advertisement
मुंबई : राज्य सरकारने एसटी चालक-वाहक पदाच्या भरतीमध्ये पास झालेल्या उमेदवारांना दसऱ्याची भेट दिली आहे. एसटीच्या चालक तथा वाहक पदाच्या भरतीमधील उमेदवारांना मुख्यमंत्री आणि उपमुख्यमंत्री यांच्या हस्ते नियुक्ती पत्र देण्यात आलं आहे. 2019 साली हे चालक आणि वाहक भरती प्रक्रियेत पात्र झाले होते. या पात्र उमेदवारांपैकी 27 पुरुष उमेदवारांना तर 22 महिला उमेदवारांना सेवापूर्व प्रशिक्षणाचे पत्र मुख्यमंत्री एकनाथ शिंदे, उपमुख्यमंत्री देवेंद्र फडणवीस यांच्या हस्ते देण्यात आले. एसटी महामंडळाच्या निर्णयामुळे या भरतीप्रक्रियेतील पात्र उमेदवारांना मोठा दिलासा मिळाला आहे.
राज्य परिवहन महामंडळामध्ये 2019 मध्ये चालक तथा वाहक पदासाठी भरती प्रक्रिया राबविण्यात आली होती. या भरती प्रक्रियेतील 1431 पात्र उमेदवारांना यापूर्वीच नेमणूक देण्यात आली आहे. मात्र, गेली दोन वर्षे कोरोना महामारीमुळे रखडलेल्या उर्वरीत पात्र उमेदवारांच्या नेमणूकीला राज्य सरकारने हिरवा कंदील दाखवला होता. त्यानंतर मंत्रालयात आज मुख्यमंत्री आणि उपमुख्यमंत्री यांच्या हस्ते पात्र उमेदवारांना नियुक्ती पत्र देण्याचा कार्यक्रम पार पडला.
