Advertisement
नवी दिल्ली : भारतीय जुन्या संसदभवनात काल शेवटचं चर्चा सत्र पार पडलं. मोदी सरकारने बोलावलेल्या विशेष अधिवेशनाचा काल पहिला दिवस होता. यावेळी हे सत्र या जुन्या संसदभवनातील शेवटचं सत्र असल्याचं पंतप्रधान नरेंद्र मोदी यांनी सांगितलं. तसंच सेंट्रल व्हीस्टा प्रकल्पाअंतर्गत उभारण्यात आलेल्या नव्या संसद भवनात आजपासून कामकाजाला सुरूवात होईल, अशी घोषणा केली. त्यामुळे नव्या संसदभवनाचा आजपासून खऱ्या अर्थाने शुभारंभ होणार आहे.
नव्या संसदभवनात आजपासून कामकाजाला सुरुवात होणार आहे. या नव्या संसदेतील कामकाजाच्या पहिल्या दिवशी काही महत्वाची विधेयकं मांडली जाणार आहेत. त्यावर चर्चा होणार आहे. अधिवक्ता (दुरूस्ती) विधेयक आज मांडलं जाईल. द प्रेस अँड रजिस्ट्रेशन ऑफ पीरियडिकल बील, पोस्ट ऑफिस बिल 2023 यावरही चर्चा होणार आहे. मुख्य निवडणूक आयुक्त, निवडणूक आयुक्तांबाबतही चर्चा होणार आहे. या आयुक्तांची नियुक्ती, सेवेच्या अटी, कार्यकाल यावर चर्चा होईल.
जुन्या संसदभवनात खासदारांचं फोटोसेशन
जुन्या संसदभवनात आता आजपासून कामकाज होणार नाही. यावेळी सर्व खासदारांनी एकत्र येत फोटोसेशन केलं. संसदेचे सदस्य असणाऱ्या खासदारांना फोटोसेशन झाल्यानंतर खासदारांना कीटचं वाटप केलं जाणार आहे. या किटमध्ये संविधानाची प्रत असणार आहे. नव्या संसदेच्या स्मारकाचं नाणं आणि एक पोस्ट तिकीट असणार आहे. सेंट्रल हॉलमधील कार्यक्रमानंतर हे किट लोकसभा आणि राज्यसभा खासदारांना दिलं जाणार आहे.
