Advertisement
अजित पवारांच्या मतदारसंघात नवा चेहरा : निवडणूक बिनविरोध करण्यावर भर
मुंबई : बारामतीमध्ये अजित पवारांच्या विधानसभेच्या जागेवर सुनेत्रा पवारच उभ्या राहणार असल्याचं राष्ट्रवादीने पक्षाने निश्चित केलं आहे. राष्ट्रवादी काँग्रेस पक्षाच्या कोअर कमिटीच्या बैठकीत बारामतीमधून सुनेत्रा पवारच पोटनिवडणूक लढवतील यावर एकमत झालं आहे. बारामती विधानसभेची प्रारूप मतदार यादी 10 मार्चला प्रसिद्ध झाल्यानंतर कोणत्याही क्षणी निवडणुकीची घोषणा होईल. राष्ट्रवादी काँग्रेस पक्षाचा निवडणूक बिनविरोध करण्यावर भर असणार आहे.
रिप्रेझेंटेशन ऑफ पिपल अॅक्ट, 1951 च्या कलम 151 अ नुसार, विधानसभा जागा रिक्त झाल्यापासून उरलेला कार्यकाळ एका वर्षांपेक्षा जास्त असेल तर 6 महिन्यांच्या आत पोटनिवडणूक घ्यावी लागते. अजित पवार यांचा मृत्यू 28 जानेवारी 2026 रोजी झाला, त्यामुळे जागा रिक्त होण्याची हीच तारीख ग्राह्य धरली जाणार. महाराष्ट्र विधानसभेचा कार्यकाळ 2029 पर्यंत असल्याने सहा महिन्यांचा नियम लागू होतो. त्यामुळेच बारामतीमधील पोटनिवडणूक प्रक्रिया 28 जुलै 2026 च्या आधी पूर्ण करावी लागणार आहे. जूनमध्ये पावसाळा सुरू होण्यापूर्वी निवडणूक पूर्ण करण्याचा प्रयत्न असेल अशी चर्चा आहे. त्यामुळेच एप्रिल-मे 2026 मध्ये निवडणूक होण्याची जास्त शक्यता आहे.
1991 पासून अगदी मृत्यूपर्यंत बारामतीचे आमदार
अजित पवार हे बारामतीमधून सलग आठ वेळा आमदार राहिले होते. 1991 पासून ते 2024 पर्यंत बारामती हा त्यांचा हक्काचा मतदारसंघ अजिंक्य ठेवत किल्ला लढवला. अजित पवारांनी अगदी विक्रमी मताधिक्याने बारामतीमधून विजय मिळवला. 1991 मध्ये आधी लोकसभेमध्ये खासदार म्हणून निवडून गेलेल्या अजित पवारांनी सहा महिन्यांमध्येच खासदारकीचा राजीनामा देत पोटनिवडणुकीमधून पहिल्यांदा बारामतीचा आमदार होण्याचा मान मिळवला. त्यानंतर ते इथून सलग आठ वेळा निवडून आले. 2024 च्या निवडणुकीमध्ये त्यांच्यासमोर त्यांचाच पुतण्या योगेंद्र पवार उभा होता. मात्र अजित पवारांनी पुतण्याचाही सहज पराभव केला. अजित पवारांनी बारामतीमधून 1991, 1995, 1999, 2004, 2009, 2014, 2019, 2024 साली विधानसभेची निवडणूक जिंकली. अजित पवार हे सर्वाधिक वेळा म्हणजेच सहा वेळा राज्याचे उपमुख्यमंत्री झाले.
