खरी शिवसेना कोणाची? निवडणूक आयोग करणार फैसला

Advertisement

नवी दिल्ली : शिवसेनाप्रमुख बाळासाहेब ठाकरे यांनी स्थापन केलेली शिवसेना ही नेमकी कुणाची आहे? याचा फैसला आता थेट केंद्रीय निवडणूक आयोग करणार आहे. राज्यात गेल्या काही दिवसांपासून शिवसेनेत पराकोटीचे अंतर्गत मतभेद बघायला मिळत आहेत. सध्याच्या घडामोडी पाहता शिवसेनेत उभी फुट पडल्याचं चित्र आहे. विशेष म्हणजे शिवसेना पक्ष प्रमुख उद्धव ठाकरे यांच्या नेतृत्वाला आव्हान देत भाजपसोबत हातमिळवणी केलेले मुख्यमंत्री एकनाथ शिंदे यांनी शिवसेना आपलीच असल्याचा दावा केला आहे. आपण शिवसेनेत असून बाळासाहेब ठाकरे यांचे खरे शिवसैनिक असल्याचा दावा केला आहे. या सर्व राजकीय घडामोड पाहता निवडणूक आयोगाने या प्रकरणाता महत्त्वाचे आदेश दिले आहेत. निवडणूक आयोगाने दोन्ही गटांना कागदोपत्री पुरावे सादर करण्याचे आदेश दिले आहेत. आयोगाने 8 ऑगस्टला दुपारी 1 वाजेपर्यंत आपलं म्हणणं मांडण्याची मुदत दिली आहे. त्यानंतर निवडणूक आयोग या प्रकरणी सुनावणी करणार असल्याची माहिती सूत्रांनी दिली आहे.