भाजप.., भारतीय जनता लॉन्ड्री पक्ष !

Advertisement

सांगली : भाजपमध्ये विविध पक्षातील दिग्गज नेत्यांनी प्रवेश केला आहे. याशिवाय मुख्यमंत्री एकनाथ शिंदे यांनी बंडखोरी करत भाजपसोबत सत्ता स्थापन केली आहे. त्यांनतर शिंदे गटाला शिवसेनेच्या अनेक आमदार-खासदारांनी पाठिंबा दिला. यापैकी अनेक आमदारांवर ईडी आणि सीबीआयची कारवाई झाली होती. पण त्यांचे भाजपसोबत संबंध जोडले गेल्यानंतर त्यांच्यावर नंतर कारवाई झाली नाही. त्यामुळे भाजप म्हणजे पापं धुणारी वॉशिंगमशीन आहे, अशी टीका याआधीही महाविकास आघाडीच्या नेत्यांकडून करण्यात आली आहे. याचाच धागा पकडत खासदार सुप्रिया सुळे यांनी भाजपचा भारतीय जनता लॉन्ड्री पक्ष असा उल्लेख केला आहे.
सांगली दौऱ्यावर आज सुप्रिया सुळे आहेत. या दौऱ्यादरम्यान त्यांनी भाजपवर निशाणा साधला.  भारतीय जनता लॉन्ड्री पक्षाच्या आमदार-खासदारांनी कायदा-सुव्यवस्थेबद्दल टीका केली आहे. राज्याच्या गृहमंत्र्यांनी आत्ता आत्मचिंतन करायला पाहिजे. राष्ट्रवादी काँग्रेसचे दिगंगत नेते आर आर पाटील गृहमंत्री असताना राज्याची काय स्थिती होती आणि आता परिस्थिती दुर्दैवी बनली आहे.  राज्यातील सरकार हे ओरबाडून आणलेले आहे. टीका झाल्यानंतर तीन महिन्यानंतर पालकमंत्री नेमले आहेत. अनेक मंत्री अजून त्यांच्या विभागातच गेलेले नाहीत. तर मंत्रालयात गेले तर अनेक मंत्रीच भेटत नाहीत. ओरबाडून सरकार स्थापन केलं. मात्र त्यातून काहीच निष्पन्न झालं नाही, असं सुप्रिया सुळे म्हणाल्या.