माजी मंत्री ढोबळे यांच्या दणक्‍यानंतर मंगळवेढा रुग्णालयातील वैद्यकीय अधीक्षकांची चौकशी

Advertisement

मंगळवेढा : मंगळवेढा ग्रामीण रुग्णालयाचे वैद्यकीय अधीक्षक डॉ. अरविंद गिराम यांच्यासह या रुग्णालयातील गैरसोयी भाजपचे प्रांतिय सदस्य तथा माजी मंत्री लक्ष्मणराव ढोबळे यांनी भर चौकात चव्हाट्यावर आणल्या होत्या. नागरिकांकडून या रुग्णालयाबाबत तक्रारी आल्यानंतर प्रा. ढोबळे यांनी कार्यकर्त्यांसह या रुग्णालयाला अचानक भेट देत वैद्यकिय अधिक्षक रजेवर असल्याचे तसेच ते वेळेवर कधीच रुग्णालयात हजर नसल्याची बाब उघड करीत या रुग्णालयातील गैरसोयीही समोर आणल्या होत्या. याबाबत भर चौकात फ्लेक्‍स लावून वैद्यकीय अधिक्षकांचा कारभार सुधारला नाही तर महिलाकडून चोप देऊ असा इशारा देत माजी मंत्री ढोबळे यांनी संताप व्यक्‍त करीत दुसऱ्या दिवशी थेट आरोग्य मंत्री तानाजी सावंत यांची भेट घेत घेत कारवाईची मागणी केली होती, त्यानुसार आरोग्य मंत्री यांनी तातडीने दखल घेत मंगळवेढा ग्रामीण रुग्णालयाच्या कारभारासह वैद्यकीय अधिक्षक डॉ. गिराम यांची चौकशी करण्याकरिता समितीच नियुक्‍ती केली होती, त्याचा अहवाल तयार झाला असून हा अहवाल आठ दिवसांत सोलापूर येथील सिव्हिल सर्जन डॉ. पाटील यांच्याकडे सादर केला जाणार असल्याचे सिमतीकडून सांगण्यात आले.
मंगळवेढा ग्रामीण रुग्णालयात वैद्यकिय अधिकारी डॉ. सुलक्षणा जानकर व राष्ट्रवादी कॉंग्रेसचे माजी शहराध्यक्ष सोमनाथ माळी यांच्यात वाद झाला होता. तर दुसऱ्या घटनेत येथील वैद्यकीय अधीक्षक डॉ.अरविंद गिराम ग्रामीण रुग्णालयात सातत्याने गैरहजर असतात तसेच येथील रुग्णालयात त्यांचे नियंत्रण नसल्यामुळे अस्वच्छता व रुग्णांना व्यवस्थित सेवा मिळत नसल्याची तक्रार माजी मंत्री प्राध्यापक लक्ष्मणराव ढोबळे यांच्याकडे आल्याने प्रा. ढोबळे यांनी भर चौकात डॉ. गिराम यांच्या कारभाराबाबत डिजिटलद्वारे आरोग्य विभागाची लक्तरे वेशीवर टांगली होती तसेच याबाबत सार्वजनिक आरोग्य मंत्री डॉ. तानाजी सावंत यांच्याकडे लेखी तक्रार करून कारवाईची मागणी केली होती.
त्यानुसार झालेल्या कारवाईत या दोन्ही प्रकरणांची चौकशी करण्याकरिता दोन समित्या नेमण्यात आल्या. डॉ. जानकर व माळी यांच्यातील वादाबाबत बाबत माळशिरस चे वैद्यकिय अधिकारी डॉ. काझी व अकलूजचे डॉक्‍टर गुडे यांची तर डॉ. अरविंद गिराम यांच्या तक्रारीबाबत सिव्हील सर्जन डॉ. डी. के. पाटील व डॉ. श्रीकांत कुलकर्णी यांच्या समितीने चौकशी केली आहे. या समित्यांकडून आपला अहवाल सादर केला जाणार आहे.

मंगळवेढा ग्रामीण रुग्णालयात घडलेल्या दोन्ही घटनांबाबत दोन समित्यांनी स्वतंत्र चौकशी केली आहे. त्यांना हवी ती माहिती दिली गेली आहे. तसेच मी शासनाकडून मंजुरी घेवून खाजगी प्रॅक्‍टिस करीत असून त्यासाठी शासनाच्या काही सुविधा, भत्ते नाकारले आहेत. ड्युटी संपल्यानंतर काय काम करायचे हा माझा व्यक्तिगत प्रश्न आहे.
- डॉ अरविंद गिराम, वैद्यकिय अधिक्षक, मंगळवेढा ग्रामीण रुग्णालय