Advertisement
मुंबई : चंद्रयान 3 चंद्राच्या कक्षेत व्यवस्थितरित्या पोहोचलं असून संपर्कही जबरदस्त होत आहे. पण आता पृष्ठभागावर सॉफ्ट लँडिंगची प्रतीक्षा आहे. इंडियन स्पेस रिसर्च ऑर्गनायझेशन अर्थात इस्रोने या लँडिंगची तारीखही जाहीर केली आहे. इस्रोच्या मते चंद्रयान 3 हे 23 ऑगस्ट 2023 रोजी संध्याकाळी 6 वाजून 4 मिनिटांनी चंद्रावर उतरेल. पण आता इस्रोकडून याबाबत महत्त्वाची अपडेट समोर आली आहे. या तारखेत बदल होण्याची शक्यता आहे. याबाबतची माहिती खुद्द इस्रोच्या वरिष्ठ अधिकाऱ्यांनी दिली आहे.
लँडर मॉड्युलमध्ये लागलेल्या कॅमेऱ्याच्या माध्यमातून काही फोटो शेअर करण्यात आले आहे. इस्रो अधिकारी या कॅमेऱ्यातून टिपलेल्या फोटोच्या माध्यमातून सपाट पृष्ठभाग शोधत आहेत. पण अजून तसा भाग काही निदर्शनास आला नाही. इस्रोच्या स्पेस अॅप्लिकेशन सेंटरचे व्यवस्थापक निलेश एम. देशी यांनी तारीख बदलली जाऊ शकते अशी माहिती दिली आहे. त्यांनी सांगितलं की, चंद्रयान चंद्रावर उतरवण्याच्या दोन तास आधी लँडर आणि चंद्र यांच्या स्थितीचा आढावा घेतला जाईल. तिथली स्थिती योग्य असल्यास लँडर चंद्रावर उतरवण्याचा निर्णय घेतला जाईल. जर स्थिती योग्य नसेल तर मात्र चंद्रावर लँडर उतरवण्याची तारीख 27 ऑगस्टपर्यंत वाढवली जाऊ शकते.
