Advertisement
सोलापुर : शरद पवार गटाला स्थानिक स्वराज्य संस्थेच्या निवडणुकीपूर्वी मोठा धक्का बसला आहे. सोलापुरातील शरद पवार गटाचे शहराध्यक्ष सुधीर खरटमल यांनी राष्ट्रवादी अजित पवार गटात प्रवेश केला आहे. उपमुख्यमंत्री अजित पवार यांच्या उपस्थितीत खरटमल यांनी राष्ट्रवादीत प्रवेश केला. यावेळी राष्ट्रवादी अजित पवार गटाचे जिल्हाध्यक्ष उमेश पाटील आणि शहराध्यक्ष संतोष पवार यांची देखील उपस्थिती होती. मागील आठवड्यात शरद पवारांच्या उपस्थितीत झालेल्या बैठकीत सुधीर खरटमल यांनी स्वतः न जाता प्रतिनिधी म्हणून कार्यकर्त्याला पाठवले होते, त्यानंतर शरद पवार गटातून शहराध्यक्ष सुधीर खरटमल यांच्यावर शरद पवार यांच्या बैठकीला भाजपचा कार्यकर्ता पाठवल्याचा आरोप झाला होता. त्यानंतर आज त्यांनी थेट अजित पवार गटात प्रवेश केला आहे. हा राष्ट्रवादी शरद पवार गटाला ऐन निवडणुकीच्या तोडांवर धक्का मानला जात आहे.
दरम्यान निवडणूक कार्यक्रम जाहीर होताच आता पक्षांतराला देखील वेग आला आहे. महाविकास आघाडीमधून काही जण महायुतीमध्ये प्रवेश करत आहेत. तर काही नेत्यांनी आपल्याच मित्र पक्षात प्रवेश केल्याचं पहायला मिळत आहे. विधानसभा निवडणुकीचा निकाल लागल्यानंतर महाविकास आघाडीमधून महायुतीमध्ये मोठ्या प्रमाणात इनकमिंगला सुरुवात झाली, ते इनकमिंग अजूनही सूरूच असल्याचं दिसत आहे. आता राष्ट्रवादी शरद पवार गटाला आणखी एक मोठा धक्का बसला आहे.
